開咗medium account好耐，一路都有諗下好冇寫下嘢，但我呢啲冇墨水嘅人始終冇頭緒。今日適逢「未瞓着」咗一段時間就求其打下瞓喺床到諗咗啲乜，紀錄下自己啲時間去咗邊咁。（唔敢話係失眠，因為喺八點幾瞓咗三個鐘。笑。）
話說呢兩日喺朋友嘅介紹下都有Loop Arvo Prät嘅 Spiegel im Spiegel。（記得用耳機）都幾中意呢首曲。用朋友嘅講法就係：「你一路聽係會有顏色㗎！」我就會話「係冰湖、係雲海、係深海入面浮沉、係漫無目的咁行跟住遇到知音」嘅感覺。聽住首曲係難得咁舒服同平靜。
咁所以呢兩晚就難得有寫下嘢睇下書思考下咁。到今晚未瞓着瞓喺床嘅時候，個腦就有好多唔同嘅念頭彈咗出嚟。其中一個最深刻嘅就係：「咦原來只要我條頸向右邊斜三十度左右咁側住瞓個鼻就唔會塞㗎啦喎。」（唔好睇少呢樣嘢，對鼻敏感嘅我嚟講係福音。笑。）跟住又諗下不如喺medium打下文（which 就係呢篇了。）後來就諗到呢種思考同平時諗嘢有冇啲咩唔同。嗰下就覺得平時嘅思考係比較responsive，通常會係為着某一個理由或者情景去諗，有一個相對明確嘅目的同方向；而呢種未瞓着嘅思考就係漫無目的咁任由自己個腦彈啲嘢出嚟俾你睇，順住意識流去行。我而家好似好清晰咁形容出嚟啦，但其實頭先我諗嘅係「一個就係游水比賽咁有目標要達成，一個就係喺個海入面浮下浮下咁。」，一個無厘頭嘅意象。（btw我係唔識游水嘅，所以真係浮。）
跟住就諗起之前唔知喺邊度睇過對所謂「禪」嘅理解：「食飯時食飯，讀書時讀書」（根據我啱啱google，原句應該係「飢來食飯困來眠」。）反思返自己成日就一心多用咁，但其實咁樣反而係更加無效率。根據我唔知幾時睇嘅唔知咩，（係，咩都唔知，but it’s 3:48 right now, so don’t expect too much lol）所謂嘅一心多用其實只不過係人大腦快速咁喺唔同嘅tasks之間轉換，本質上都係要一心一用，而你仲要花多咗能量喺換task嗰度，其實係唔多實用。而同時又有啲咩「心流理論」話人類喺某啲情況下會「完全沉浸在手頭的任務上，不會有意識決定如此；因而失去了對其他事物的感知：時間、人、分心的事、甚至基本身體需要。這是因為在心流狀態人的全部注意力在手頭任務，沒有可分配的注意力。」（係，我係喺維基copy返嚟，但佢係有source㗎，笑。）其實我會簡單咁叫做「入神」。好明顯地「入神」咁做一樣嘢係會比你不停咁轉嚟轉去更有效率同埋做得更好。我諗好多一心多用嘅人其實都係覺得咁好有效率啫，但唔係㗎，所以你可以停㗎啦。笑。簡單嚟講：專心啦XX。
講返轉頭，頭先講我地平時嘅思考可能係目的性比較重，可能都可以同「一心多用」呢樣嘢拍埋嚟睇。而家社會節奏快，樣樣嘢都要講效率，個個都得閒死唔得閒病，無時無刻都有幾廿萬樣嘢要做，有問題要解決。其實好難可以坐低靜落嚟唔諗咁多專心咁做一樣嘢（要係自己鐘意嘅嘢就更難），身邊好多朋友時不時都會話好耐冇睇書睇電影/做啲自己好鐘意做嘅嘢。根本我地每一日就係俾大量嘅tasks/煩惱包圍住，「一心多用」又好，淨係為咗解決問題先思考又好，其實都係逼出嚟㗎啫。大部分人細個嘅時候都好有想像力，諗埋啲鳩嘢，係大下大下先太忙唔太咁做。但如果可以嘅，我希望睇緊呢篇文嘅你可以抽時間順住自己個腦pop up出嚟嘅嘢漫遊下，放空下自己。（反正咁樣唔洗俾漫遊數據費，而你睇得呢篇廢文都應該有時間，笑。）單純咁為思考而思考，享受下「思緒窮遊」其實都幾好。
寫到嚟呢度已經係四點幾。如果你睇到嚟呢度嘅，好多謝你。你頭先睇嘅就係我一路諗到一路打返出嚟嘢，你已經喺唔同嘅時空同我度過咗一個鐘，計返可能已經多過我唔少朋友。（如果你本身係我朋友嘅，咁你用五分鐘賺咗一個鐘啦。笑。）小弟一路都覺得寫嘢俾人睇其實係一件幾得人驚嘅事。一個人最private嘅空間就係自己嘅思維，而寫作就係紀錄呢個最私人嘅空間所發生嘅事。要同其他人講，就係要其他人自我剖析同坦白，始終會令我卻步。再者就係你寫得出嚟就可能會俾其他人批判。（雖然分分鐘唔會有人睇添。）頭先睇到奇啲陳有篇文講嘅嘢係幾中我心聲。（佢中文系畢業，講嘢有文有路，未follow佢嘅要follow啦）
一嚟係好清楚自己寫得唔夠好，應該可以寫得再好啲，好記得上現代詩寫作坊聽過夏宇嘅一句說話：
我發現對我寫過的詩我差不多都是不安的因為我沒能把它們寫成另一種樣子
雖然文章同詩有啲唔同，應該寫極都唔會做到改頭換面，但我去到pub嗰下都仲係覺得我寫得唔夠好，睇返都覺得辜負咗篇文，但係同時我又好驚再拖落去會冇咗令篇文面世嘅衝勁
講到尾真係覺自己寫得唔夠好，所以雖然我其實間中都有寫下隨筆都唔會話俾人睇/同人傾。好在之前同奇啲吹水佢講過：
所謂嘅散文/隨筆，其實就係亂噏。
諗起呢句時打文嘅心理負擔就細好多嚕。都係亂噏啫，唔洗諗咁多～或者今次都係一個契機去試下將自己寫嘅嘢俾其他人睇。
以上。之後再睇下有冇機會/有冇嘢想講啦。Bye~~
P.S. 唔好學我咁夜瞓，有研究話瞓覺係人腦清理廢料嘅方法。喺人瞓覺嘅時候腦脊液會將腦入面嘅廢料帶走，refresh返你個腦，為第二日嘅工作做好準備。你keep住唔夠瞓嘅話，你個腦分分鐘俾啲廢料塞爆咗。所以，冇充足睡眠嘅思考不過係笑話。（可能亦係我幽默感嘅來源，笑。）
有興趣可以睇下我其他雜文～
