本身十二月嗰陣就諗住趁墟寫下年度總結，點知就一路都忙加懶，早輪得閒嘅時候又去咗清舊文，變咗二月尾先開始寫，寫寫下又過咗三月上旬。不過遲都好過冇，好似係。
認真其實唔知有咩總結，好佩服唔少人好似都有好大進步，又或有啲有深嘅感悟咁。可能我本身就唔太 festive，對於所謂新一年其實冇乜特別大感受，但借住呢個機會停低諗一諗沉澱下都係一件好事。我諗呢個都係節日其中一個重要嘅意義：俾人一個機會／借口去做啲平時未必會做但又想做嘅嘢。
其實回首過去嗰一年，好多嘢都已經好模糊。其一可能係因為返工生活本身就冇乜特別咁，weekdays 基本上都係「屋企−公司−屋企」三點一線，返到屋企個人又攰冇乜精力，好多時都係攤喺梳化碌 ig，咩都冇做，極唔 productive。好在慢慢都叫適應咗，有少少餘力去做下其他嘢。其二就係因為疫情，其實都冇乜嘢好做，晚市又停，平日夜晚基本上都唔使諗約人，好啦到週末，限聚令下最多四個人，而家就直頭限兩個；食完飯又唔知有咩好做，戲院 K 房酒吧博物館全部唔開，行夜少少啲舖頭都已經閂門，行出街好似 I Am Legend 咁。喺咁嘅條件下，都幾難有咩深刻回憶。
不過雖然好似未諗到有咩事件係特別深刻，但同再上一年比，又好似都有啲轉變。所以都略略講下啦。
1. 入多咗戲院
一路以嚟都唔多入戲院，因為好懶，覺得買戲飛盛好麻煩，又要特登換衫出街。但上年就唔知戚起邊條筋，主動約多咗朋友睇戲，之後就睇多咗戲。留意返，個睇多咗係同我自己比㗎咋，個次數都係少過唔少中意睇戲嘅人。下面羅列下我記得自己睇咗嘅戲：
好幾套都係揾返啲飛先醒起自己睇咗。計計埋埋啱啱好平均一個月睇一套。呢個數目對我嚟講已經好多 lol，本身應該可以再高啲，無奈疫情下戲院冇得開，本來想睇今敏嘅《妄想代理人》都冇機會。希望戲院快啲開返啦。至於對上面啲戲嘅感想，有啲單獨寫過，有啲冇，呢度就唔詳述嚕。簡單講下就係：今敏真係好正；我真係睇唔明歌劇；Mads Mikkelsen、Benedict Cumberbatch、Ian McKellen 同 Patrick Stewart 全部都好型！
2. 使多咗喺打扮
使多咗係指包括金錢、時間同心力三樣。
話說我一路以嚟都係黑白灰三色咁嘅打扮，後來因為感覺顯肥所以灰白少咗，深藍／牛仔布就接替咗佢哋嘅位置。成個衣櫃有四五件黑色 t-shirt，基本上就係頹 look，當然啦，我會美其名話係 normcore，係真唔係就見仁見智啦。
上年就覺醒咗咁，想試下唔同嘅打扮，開始出街嘅時候會留意多咗街上嘅人嘅打扮，睇下有冇啲可以參考，又會喺 instagram 睇下啲人着衫，睇到個 explore 都多咗男裝，跟住又會拉啲朋友同我一齊行街俾啲意見我。而家唔敢話着衫好睇咗好多啦，但起碼係有啲新嘅嘗試，冇以前咁悶。
更重要係心態上嘅改變：以前會覺得衫呢家嘢，舒服就得啦，打扮都係為人哋，搞咁多嘢唔值得；而家就慢慢明白打扮本身嘅樂趣，揾到一兩件自己中意嘅 item 本身就好開心，而將自己腦海中嘅配搭成功喺現實展現出嚟嗰種樂趣其實咪同創作一樣，因為「有人認同自己嘅打扮而開心」唔會比「因為有人讚自己作品而開心」膚淺幾多。
小王子入面話「For instance, if you come at four in the afternoon, I’ll begin to be happy by three. The closer it gets to four, the happier I’ll feel. By four I’ll be excited and worried; I’ll discover what it costs to be happy! But if you come at any od time, I’ll never know when I should prepare my heart… There must be rites.」，喺出街嘅前一晚就諗聽日着咩衫、噴咩香水好，某程度上都變咗一種儀式，同理會擔心襯得唔好，會擔心朋友見到覺得唔好睇，甚至試過着完落到樓下就後悔，但佢終究都令我出街嘅喜悦提早到未出之前。當然啦，我都希望日後自己嘅襯搭能力可以進步到唔會咁戰戰兢兢啦。
然後，更進一步就明白咗啲人點解中意自拍／影相。以前自己唔太中意影相，某程度上都係自信不足啦，又因為好似冇乜值得影咁；但而家就會覺得，即使花咗心機去打扮都未必次次滿意，難得覺得唔錯嘅，自然就會想影低佢啦。雖然好似好自戀，但戀上一個值得欣賞嘅自己唔係好正常咩？甚至有時唔係好中意，影低佢都好似係個 reference，可以諗下點樣再改善。諗諗下好似直頭唔理點都應該影低紀錄下咁。不過大家可以唔使期待／擔心，呢度係唔會有相睇的。
最後分享下早輪買嘅得意戒指仔，其實我覺得好難襯，但佢真係好得意，所以我最後都係買咗，笑。
3. 寫多咗嘢
雖然我 Medium 出文嘅頻率係疏過之前，但感覺自己係寫多咗嘢。多咗寫信俾唔同嘅朋友，又有啲唔同嘅寫作嘗試（雖然冇 po 出嚟），感覺幾開心。特別係寫信俾朋友，個感覺同平時 text message 好唔同，講嘅話題，語調都會有啲分別。一方面可能係個 pace 會自然放慢咗，另一方面亦可能單純係因為個 context 唔同咗，自然就會有唔同。然後我寫信嗰陣習慣會抄首詩俾對方，可能係咁啱呢排睇緊，又或者係突然諗起，有啲朋友又會抄詩俾我，成件事好滿足。
跟住就會諗起啲人成日話咩「手寫嘅文字係有温度嘅。」。個人好憎呢句嘢，感覺好矯情同埋好濫。就算手寫嘅文字真係有温度，俾句嘢咁講完都會變咗係剩菜殘羹嘅餘温，完全唔吸引。同埋有温度呢個講法本身就好奇怪：咩叫有温度？絕對零度都係温度嚟。哈比人都有高度㗎喎。用呢個講法嘅人，語文好唔好我唔敢講，但科學感覺上就差啲啦。我只能夠話，手寫嘅文字唔只有温度，仲有長度同闊度，有啲仲有斜度添。
講返寫嘢，感覺上年都係我書摘抄詩最多嘅一年，莫明其妙地好似睇多咗少少詩。可能因為身邊多咗啲朋友會講起詩，一講起又會揾嚟睇一睇咁。以前總係覺得「詩」離自己好遠，有種太陽春白雪嘅距離感，但而家慢慢又會覺得其實都唔係，而且亦冇以前諗得咁難明。反而好多短詩睇起嚟係幾舒服，又冇負擔～
順便分享下兩首上年抄咗落嚟嘅詩，等大家感受下「温度」。左邊係周夢蝶嘅《善哉十行》，右邊係狄仁嘅《握手》。本身諗住講下《善哉十行》，但諗諗下都係有機會寫篇文算。（冇就由佢，笑。）
寫到呢度，已經冇咩特別嘢想回顧，無謂夾硬諗啲嘢出嚟寫，講下年度總結本身作結啦。以前咁多年都冇寫年度總結，今年係第一次寫。唔否認的確係個幾好嘅機會去停低諗一諗自己往年到底做咗啲咩。特別係近年覺得時間過得快咗，好似咩都冇點做就過咗幾個月咁。喺疫情期間就更加，好似睇所有人都多咗個口罩嘅濾鏡，人人日日都差唔多，冇咗時間嘅比照物咁。又咁講，係咪如果冇疫情我就會多啲嘢寫呢，可能都未必，大家都知我一向懶開，再者亦唔係樣樣嘢都值得寫，可能到時都係差唔多篇幅。又不過，有寫總係好過冇寫嘅。寫多一篇文章，有多一篇文章嘅沉澱；寫多一隻字，亦有多一隻字嘅思考。所以希望來年年底嘅我都可以延續呢個習慣，更希望今年嘅我可以有更多值得喺年度總結寫低嘅進步同改變。不盡。
