話說一直都偏好啲所謂真人真事改編嘅電影有（唔包括恐怖片。）又唔係會特別覺得佢哋好睇，但就係特別俾佢哋吸引到。話說我間中醒起就會開下電影中心有咩戲睇吓有冇嘢有興趣，咁啱就見到呢套戲，睇完個描述就覺得好吸引！一路話想睇最後拖咗半個月（同我寫文一樣，證明我個人幾一致，笑。呢篇文都拖咗兩個幾月了⋯⋯）
套戲由真人真事改編，講十七世紀意大利一個修女 Benedetta 喺修道院修行，顯聖，最後被指褻瀆嘅故事。Benedetta 自細就俾父母送咗去修道院生活。佢喺去嘅路上就已經有異象好似有聖母保佑咁：喺俾啲騎士包圍索賂時，佢話聖母會保護佢懲罰對方，就真係有雀仔飛出嚟放飛彈去個出言不遜嘅騎士塊面度。入到修道院之後佢因為寂寞夜晚自己走咗出去聖母像前祈禱，石造嘅聖像跌落壓住佢好似安撫佢咁，而 Benedetta 絲毫無傷呢件事就令見到嘅姊妹驚歎神蹟。自此異像不斷，後來佢身上更有聖痕出現，亦因此而可以同修道院院長爭權成為新院長。
套戲一開始 Benedetta 老豆送佢去修道院同院長傾計嗰幕其實就已經好點出套戲嘅主軸：佢哋就住要捐幾多錢俾修道院爭持咗一輪，最後院長講咗一句「乜耶穌的新娘唔值 100 個金幣咩？」。神聖嘅價值係可以被量化、計算同埋談判嘅。而且佢係可以被凡俗所定義同運用。相似嘅句子後來亦有出現，喺修道院眾人驚嘆 Benedetta 冇俾聖母像壓死係神蹟之際，院長對佢個女輕輕咁講咗句「神蹟有時帶嚟嘅麻煩遠超佢所值嘅。」然後就轉身離開。
隨住故事發展，有人支持 Benedetta 成為院長，擁護佢作為肉身聖人；亦有人唔相信佢，希望揾到證劇拉佢落嚟，甚至不惜作偽證告狀，又去揾主教希望可以對付到 Benedetta。但呢兩邊嘅人係咪就真係相信／唔信 Benedetta 身上嘅神蹟呢？哪怕係 Benedetta 身邊最親密嘅同性愛人都唔相信佢，多次問佢到底點做到啲「神蹟」出嚟。雙方唔同嘅取態不過係出於自身利益／立場：修士長希望可以借 Benedetta 封聖嚟令整個地區地位提升從而更進一步成為主教；院長個女覺得媽媽失去權力自己失去優待唔甘心；院長希望 Benedetta 可以令到修道院嘅地位有所提升而冇反抗。喺當中，冇乜邊個係真心在乎「神聖」嘅真假，唯有 Benedetta 係真係相信自己係見到耶穌且同對方立約。當然會有人質疑其實佢亦都唔信，但就算係佢都係做戲做全套，成套戲入面係冇質疑過呢樣嘢，每次講嘅都係同一套說詞。
結尾時，院長幫 Benedetta 指控主教為城鎮帶嚟瘟疫，最後投火自盡。喺之前佢哋有一段對話。Benedetta 好同情咁同院長講「你為此奉獻一生嘅嘢，你根本唔相信。」再一次指出對於大部分人嚟講，所謂嘅神聖不過係一個圖章去 endorse 自己嘅行為去謀利。
喺片尾結幕嘅時候有講到 Benedetta 講嘅嘢的確成真，喺瘟疫席卷全國之際，佢哋個城鎮係咩事都冇。即使如此，佢仍然因為同性戀罪而要受罰，終身困於修道院內，只能係夠地下食嘢。到底褻瀆嘅係 Benedetta 定係主教／修道院嘅其他人呢？
個人唔太中意個譯名，夾硬食字聖同性。性雖然有出現，但比例唔係咁高。慾的確存在但係係權慾，而唔係性慾。個人覺得個譯名搞到套戲係咩官能情慾片咁，偏離咗個主題。不過我知有人係中意呢個名嘅 （ Min，笑。）呢啲各花入各眼啦。
最後唔借套戲對宗教批評太多了，有啲老套，講下一啲個人感想。我幾中意啲宗教主題嘅電影，之前 Netflix 套 The Two Popes 我都覺得好好睇，但有時都幾難投入。可能因為我本身就唔係信徒，成日覺得自己會不經意就帶有偏見咁睇。不過咁講，我都仍然覺得宗教係有其作用嘅，特別係現實生活遇過一啲好好嘅教徒之後。又調返轉咁講，我唔否認我對信徒（唔只基督徒啊。）嘅期望係會高過對普通人，變相好多時都係失望居多。有時都幾羨慕啲信徒，會比一般人多咗個依靠，多一個信心嘅來源，少一份擔憂，但羨慕還羨慕，自己始終唔係信就唔係信。諗落都幾似啲人單身羨慕其他人拍拖，但你叫佢揾個伴拍拖就偏偏唔肯。雖然隔離屋草坪好似係綠啲，但始終都係自己屋企好啲嘅，諗太多都冇用，等有一日真係搬屋再算啦。
後記：
本諗住寫，寫寫下擺低咗一輪，點知跟住就忙到得返半條人命，再加上我懶，得閒啲嗰陣又去咗打機／Hea，搞到拖到而家，有啲本身想寫嘅嘢都唔記得咗，為咗贖罪，要向大家推介返朋友寫 Benedetta 嘅影評，寫得好過我，去捧下場啦～笑。
