本來唔打算寫呢本嘅讀後感，因為佢通本都係誌異向嘅小說，而且係冇乜教育意義嘅誌異故事，好睇係好睇，但就唔知有乜好寫咁。不過最後都係決定短短哋寫下，當中決定性嘅其實係個書名《三生煙火，換一紙迷離》。
但喺講書名前首先輕輕講下內文先。本書入面有六個故事，加上一篇唔知完成咗未嘅遺稿同一篇代跋。
喺咁多個故事入面個人最中意《高棧敷》同《紫障子》。前者係講一個男人喺自己間房望過對面屋度見到一個神秘女子，喺同對方傾計嘅同時慢慢發現一啲奇怪之處；後者就係講一個男人去到異地探朋友，但朋友有事忙緊，就揾咗一個藝妓做導/伴遊同佢周圍行下，而喺旅程當中佢遇到一啲難以解釋嘅事。好啦，講完都好似冇講咁。但真係諗唔到點樣唔 spoiler 但又有趣咁講到個故事出嚟，只能夠話我真係功力未到，有興趣嘅朋友都係自己睇下啦。我只能夠話我好中意嗰種氛圍，最多係詭異，而唔係恐怖。
好，入返正題。當初一見到個書名就覺得好矯情，好似嗰啲網絡流傳名句咁，啫係早多十年啲人會用嚟做 MSN 簽名嗰啲呢。而睇完本書之後就更加覺得係格格不入。泉鏡花啲故事係好唯美細膩，除非去到結尾要收結好多時都會比較隱晦，特別係情感方面。三生煙火，換一紙迷離呢句嘢就完全相反，直白得誇張，恨不得掏心掏肺咁講哂俾人知咁。
當然我都驚係我唔知呢句嘢背後嘅典故，特登 google 下。呢個書名好大機會係化用「用我三生煙花換你一世迷離」。一揾就會見到一大堆 content farm 無獨有偶都話呢句嘢係出自蒲松齡嘅《聊齋誌異》。但又唔見佢哋引到原文出嚟，然後幾個網站嗰段嘢都係大同小異咁。
就咁睇就好大機會係有人自己作古風句子然後自己（或者他人）偽托《聊齋誌異》。睇返百度百科個編輯紀錄個條目係二零一一年四月開，喺 google 較返日期後揾到句句子最早係二零零九年喺「皮皮勵志網」出現，之後亦揾到喺二零零七年「果果勵志網」上有一句類似嘅句子「願用我三生煙火，換你一世深情不悔。」咁我相信呢句應該係原句啦。如果大家揾到個早啲嘅 source 又或者揾到蒲松齡真係有咁寫過嘅，無任歡迎話俾我知！
點解我要花時間咁樣搞一大輪呢？第一係我無聊，呢樣當然，但其次係我真係好不解點解出版社／編者／譯者會揀個咁嘅書名。而喺我揾完一輪之後我就更加不解。正如上言，句子矯情到爆炸，就算真係蒲松齡寫嘅我都會唔中意。但矯情唔代表佢唔好，可能佢符合本書呢？但又唔係喎，本書啲故事唔係走煸情路線而係唯美、靈異又或故弄玄虛，係完全唔夾個書名嘅。淨係睇入面收錄嘅故事名都感受到格格不入啦。
不過又咁講，其實可能係我吹毛求疵，又或者係我落後於時代，大眾就係中意呢類型嘅書名，咁就真係不得而知啦。但俗語都話「唔怕生壞命，最怕改錯名」，一本好地地嘅書，最好都係配返個正正常常嘅名啦。
後記
必須要講下本書嘅封面：啲顏色真係搞唔掂⋯⋯ 通常我都係自己影相就算，但呢本實物一影就炒哂車，唯有去博客來揾返幅相嚟。又所以咁講：攝影真係專業嚟。
另，後來唔知喺邊度睇到篇文講話書名係唔關譯者事嘅，佢哋淨係負責內文，如果真係咁就我上面錯怪譯者啦。
呢本書你⋯
— — — — 睇過／冇睇過 — — — —
中意／唔中意｜有興趣／冇興趣
— — — — 有冇話點解 — — — —
書名：《三生煙火，換一紙迷離：泉鏡花的幻想小說選集》
作者： 泉鏡花
譯者：王俊、周覓
出版社：九韵文化
ISBN：978-986-7101–96–9
