如果對本地書店有一定認識，一定會知道序言嘅存在。甚至可以掉轉咁講，如果一個人唔識序言，佢對本土書店嘅認識基本上有限。咁講可能有啲誇張，但序言喺我心目中的確係佔有一個好特別嘅地位：正如文題所講，佢係起點。如果唔係序言，我可能唔會認識到其他嘅本地書店，亦唔會接觸到一大堆文化活動，連寫文都未必會開始。
呢刻我已經唔記得我最初係點知序言呢個地方，亦唔記得第一次去到底係點，但我都幾肯定我當時其中一個諗法一定係，「好臭啊喂！」。唔好誤會，我唔係話序言臭，我係講緊樓下樓梯入口。我對序言其中一個深刻印象就係樓下嗰一間 LUSH。我成日同朋友戲言話，「行到西洋菜南街，合埋眼都揾到序言啦，用個鼻聞就得。」（btw 另一個咁嘅地方係尖沙咀 K11 Musea）對於鼻敏感嘅我嚟講，LUSH 簡直係地獄。The dose 唔止 makes the poison，仲決定咗我個鼻到底會有幾痛苦，而 LUSH 永遠唔會令我失望，就算行咗半層樓梯都仲係聞到佢陣味。
講起樓梯，序言棟大廈啲樓梯亦係世界級。一入去啲磚啲 pattern 好似好靚咁啦，但大部分都係崩嘅。我每次行嘅時候都好驚一個唔小心就會仆親，特別係落嗰陣，如果嗰日買咗嘢就更加膽顫心驚，連扶住嘅 capacity 都冇，到時真係一失足成千古恨。不過又咁講，到而家去過序言咁多次，都冇試過真係出事，一定係書神保佑。
而去序言路上需要書神保佑嘅又點止樓梯，當你上咗一層樓梯諗住搭𨋢嘅時候先係真正考驗嘅開始。首先，等𨋢個位個窄啦，如果有其他人要行樓梯上時就要大家互相就一就去讓，特別係多人等𨋢（「車立」字嚟 < in case 佢出唔到隻字。）嗰陣。好啦，終於𨋢到咗，第一次去嘅你急不及待就撳七字，就喺呢個時候，「砰」一聲，𨋢門一閂就夾到後面嘅人：序言部𨋢係舊式𨋢，一撳樓層就會閂門。搞到我每次入𨋢都好驚前面嘅人撳制，要用手撳住𨋢門；而如果我係最早入嗰個，um….，咁講啦，如果你搭嗰部𨋢嗰陣有遇過有人喺其他人諗住撳制嗰陣好肉緊咁想制止，話部𨋢一撳制會就閂門，你可能就有撞過我，笑。
好啦，咁我哋而家終於入咗門，但要驚嘅嘢係未完㗎。首先，如果你輕輕用腳敲下塊地，佢係好似空心咁嘅。其次，心水清嘅朋友喺等𨋢嘅時候應該會見到門上面貼咗張紙，話部𨋢已經老，每次最多載五個人，唔係有機會壞。壞，啫係困𨋢啊。困𨋢都得人驚，仲要係呢部老爺𨋢，都咪話唔驚。再者，呢部𨋢每次停嘅時候都會上下搖，個幅度都真係幾得人驚，我每次就到嘅時候都會紮定個馬先，卸一卸度力。
搞完一大輪終於入到序言。第一樣要講嘅，係店長：未未真係好得意！話說呢樣其實都係我對序言嘅第一印象：一間有貓嘅書店。而貓對我嚟絕對係一個極大嘅加分位。（當時嘅我應該仲未知森記嘅嘅存在，當然即使知都有分別，因為我知道森記咁耐都係未去過）話說我到而家都唔知其實未未認唔認得我。雖然我上到去通常都會俾隻手佢聞下，摸下佢，但我始終唔係成日上去。不過佢記唔記得我都唔重要，唔討厭我就得：上年冬天有日上序言，坐咗喺梳化，未未突然跳咗上我大脾度，大概貓同人一樣，都有需要互相取暖嘅時候。
講起張梳化，我有唔少次坐喺上面瞓着咗。諗諗吓其實都幾痴線，無啦啦喺人哋舖頭瞓着咗。等我美化下成件事先：大概係序言俾到人一種安心感，可以好放心咁停留喺呢個地方，一個唔小心就太過放鬆咁瞓着咗～不過呢個真係壞習慣嚟，大家千祈唔好學我！
講返正經嘢先，雖然呢兩年因為疫情令到好多嘢停滯咗，但一向序言都會搞活動，（或者調返轉講，唔少本地書店嘅特色就係咁 build up 返嚟。）
淨係我記得參加過/撞到過嘅都好幾次，其中一次係西西嘅讀詩會咁嘅活動，冇記錯嘅話應該係因為西西有本中英對譯嘅詩集出咗（真係唔肯定，上去序言個網直頭揾唔到個記錄，可能係孟加拉效應，笑），所以有個咁嘅活動。點解我會記得呢個活動呢，首先，嗰次活動我係有嘢做早走冇聽哂全程嘅；再者，就係呢次活動嗰陣我冇買到本詩集，後來做功課想用嘅時候就已經買唔到，最後一段時間之後先返貨，嗰次見到就即刻買返了，兩者都證明遺憾係比完滿更入心。
最後寫下喺序言買過嘅書啦。之前清明堂嗰篇文有講過，「當你可以輕鬆數到你喺間書店買咗幾多書，你就知真係買得唔多啦。」，而我係數唔到自己喺序言買過咩書嘅，但其實又唔係話買好多，可能只係我記憶差，笑。
醜話說在前，左邊嗰本《玫瑰是沒有理由的開放》係我影嘅幾本書入面唯一一本睇哂嘅書，睇完一輪都未寫後感，擺到開始唔記得了，簡單嚟講就係講唔同 style 嘅新詩，姑且咁講啦。右邊就係我上面講嗰本詩集，個人覺得譯得好正，特別係《綠草叢中一斑斕老虎》，冇諗過圖像詩都可以俾佢咁樣譯出嚟。好推薦大家買嚟睇下～
中間嗰兩本都係夏宇嘅詩集。當時見到序言個 instagram 出 post 話返咗批夏宇嘅簽名詩集，就即刻 send 俾幾個 friend，最後出咗去買，仲幫個 friend 買咗本。《脊椎之軸》好特別，啲字唔係用墨印上去，而係壓出嚟，所以本本都會有啲唔同，支持大家買嚟睇下。
左邊買係因為有朋友好中意韓麗珠，同埋覺得要支持下香港本地作家。（雖然我買書都唔洗咩理由，想買就買了。）右邊就係因為北島好出名，笑。初初開始認識新詩嘅時候就係某幾個名：卞之琳、北島、顧城，係後來先慢慢識其他詩人。所以嗰時就買咗呢本詩集，咁啱入面就係有最出名嗰首《回答》。
跟住中間又係北島啦，係我買完上面嗰本睇咗一半之後再買嘅。一就係想睇下北島唔同作品啦，特別係呢本係散文嚟；二係中意個封面， Oxford 出嚟硬皮書大部分都好正；三就係覺得書名好正，唔知點解覺得「青燈古佛」呢組詞係有種美感喺度。跟住左邊呢本好得意，係講香港開埠早期嘅風月趣事，而作者並唔係走低俗艷情嘅寫法，甚或更有教化意義，見到嘅文友不妨買嚟睇下～
右邊嗰本就係講美國嘅警察系統嘅。話說序言嘅英文書大多都係呢類型社科嘢，再唔係就哲學，所以我都唔常喺序言買英文書，畢竟社科書已經唔易讀，仲要用英文真係難上加難。
店名：序言書室
地址： 旺角西洋菜南街68號7字樓
(旺角地鐵站D3/E2出口，Body Shop對面，LUSH隔離入口上兩層有電梯)
