1. 合理化自己
唔知由幾時開始,好多人當咗自己係 rapper 咁,將「真」睇得咁重。佢哋會覺得真係一種至高無上嘅美德。但正如回魂夜咁講「七孔流血還七孔流血,死還死,兩回事嚟嘅,你千祈唔好混淆。」
好多人都會認同「真」/ 誠實本身係一種美德嚟。我諗冇人會話自己中意虛偽嘅人,但喺日常生活中我哋唔難發覺「真」同「假」以及「好」同「壞」並唔係必然對應。如果唔係就唔會有所謂嘅 white lie。
而我唔中意講呢句嘢嘅人唔係話佢份人唔真,而係真正嘅佢唔見得有幾咁討好。從來冇人講過一個人「真」就一定係好㗎喎。甚至我哋可以諗到好多人嘅「真」根本就不堪入目。當一個人講呢句嘢時,就好似佢唔需要再為自己任何錯誤負責咁:因為真正嘅佢就係咁㗎嘛。突然之間,唔理佢係好定壞,將真正嘅自己表露無遺嘅對方都好似站立於道德高地之上咁。
2. 轉移責任
承接上面所講道德高地嘅問題,當對方話佢就係咁真嘅時候,佢唔單指係講緊自己嘅本質就係咁,更加係讚賞緊勇於表露本質嘅自己知行合一。咁就帶嚟一個問題:本身打算指責對方嘅人突然就企咗喺「真」呢樣美德嘅對立面咁。
我哋可以對比吓「我份人係咁㗎啦」同「我份人係咁真」。前者雖然有啲無賴,但佢並冇指責對方嘅意味,最多係交個波俾對方暗示「你唔滿意咪 quit 囉」;但後者係隱含住價值判斷㗎:「我份人真喎,你唔係要我變假下話?」喺呢個時候,個責任竟然變咗喺聽到佢講嘅嘢唔開心嘅人身上。唔接受嘅,你就變成一個逼人變假嘅人。認真諗一諗就會發覺呢件事到底有幾荒謬。
3. 忽視對他人嘅傷害
人與人嘅相處同溝通,先唔講先帶嚟咩好處,但最起碼唔好造成傷害先。但講呢句嘢嘅人偏偏就係無視呢一樣嘢。當一個人講得呢句嘢嘅時候,佢就係冇諗過,亦唔在乎聽嗰個人到底會有咩感受,而只係沉醉喺對自己嘅美好幻想之中。講到底,其實就係自私兩隻字。好多自私嘅人都好擅長於打住唔同嘅旗號去做一啲自私嘅行為。明槍都難擋㗎啦,仲要防暗箭就真係返工都冇咁忙。明知人哋唔中意聽,仲要刻意講,仲要搞到「忠言逆耳」咁樣拎個彩,而聽嘅人被傷害嘅同時仲要俾人上面咁樣情緒勒索,真係慘到無倫。須知良藥苦口,但毒藥未見甘甜;忠言逆耳,但惡言更甚。搞唔清呢個道理,只會令自己同身邊嘅人都受苦。
對於呢句嘢有咩改進嘅空間,我都花咗一段時間去諗。但思來想去,得出嘅結論都係無。呢句嘢就係唔講得。「我份人係咁真/直」呢句說話就等於「No offense」一樣,講得都一定係 offense 㗎啦。起碼我就從來無聽過人喺讚人之後講呢句嘢。
如果你係有咁講過而冇意識到呢句嘢嘅問題,我希望你睇完呢篇嘢後可以明白。當你冇站在對方立場去諗佢嘅感受,而又放大咗自己嘅存在,好大機會就會造成傷害。如果你係在乎對方嘅,起碼從對方嘅角度出發,而唔係自己諗到乜,想講乜就講。
如果你係有人喺生活中咁同你講過嘅,我希望你嘅生活圈子中嘅人都有所進步,又或者揾返更適合佢嘅圈子,令你嘅生活變得更美好。