話說我屋企係對住山嘅，咁夏天嘅時候因為座向嘅問題基本上唔會有風入屋，會入屋嘅就只有昆蟲：蝴蝶、蜜蜂、黃蜂、蟬、飛蟻。所以每年夏天一到就係意志嘅考驗：太快開冷氣好似唔環保；唔開又真係好熱。基本上每年就係儘量淨係開風扇去到真係頂唔順忍唔住先開冷氣。而不得不承認呢種堅忍嘅行為有時係會帶嚟一種滿足感，一種暗地同人較勁嘅莫名優越感：「下你咁快開冷氣？我仲未開喎～」
直至有日，我頂唔順覺得好熱開咗冷氣，我就突然開始諗：呢種冇乜意義嘅自苦到底係為咗乜？佢到底係我達到一啲目標嘅方法定係目標本身？我到底係為咗乜要要忍住唔開冷氣，熱到面紅耳赤頭昏腦脹咁 ？為環保？為咗「磨煉意志」？但我係咪真係有諗清楚成件事嘅代價同回報呢？
諗返轉頭，未開冷氣嗰陣個人有時直頭係運作唔到咁，一路做嘢就一路滴汗，打幾行字就要抹一抹。意志同專注力都去咗抵抗熱力，生產力近乎零。成件事完全係吃力不討好。唯一嘅得着除咗冇開冷氣慳返嘅電同埋碳排放，就係之前提過嗰種滿足感：嘩我真係好好辛苦呀！我真係付出咗好多！慢慢就覺得呢種咁嘅自我滿足與毒品無異，沉迷於自己付出左幾多而唔係諗自己嘅付出咗啲咩回報，浪漫化自己嘅行為，某程度上掩飾咗自己嘅愚蠢：啫係你買股票都唔會好自豪咁話「嘩我今個月用咗好多錢買股票啊！」啦，要睇你賺咗幾多錢或者有咩前景㗎嘛。當然有啲行為唔可以咁直接用性價比去睇，但無論如何，沉迷付出不能自拔都唔會係一個好習慣。
須知人嘅意志有限，冇意義嘅自苦就係虛耗嘅我哋嘅意志。我哋應該將意志當係時間或者金錢咁樣去看待學識點樣去分配。坊間有唔少工作法其實都有提過呢樣嘢，要跟返一日入邊唔同時間意志嘅唔同去分配工作。不過呢度就唔贅述啦，有興趣嘅朋友可以試吓搵吓～
又，除咗刻意忍耐痛苦之外，個人認為將自己時刻放置喺誘惑面前其實都係種自苦。無時無刻都要面對誘惑就啫係每分每秒都要用意志對抗本能，唔係話一定唔得，但真係唔係人人得囉，如果唔係坐懷不亂嘅故事都唔會流傳至今啦。君子不立危牆下，做人最忌就係太有自信。要抵抗誘惑，最好嘅方法就係唔好面對誘惑。例如你係減緊肥嘅，就直頭唔好買零食，唔好買完返嚟日對夜對死忍爛忍。你用咗意志力嚟忍住唔食又唔係一定忍到，但又可能少咗意志去做運動，根本事倍功半。
可能有啲朋友會話佢哋自苦成正正就係一種投資，希望可以增強自己嘅意志。我唔反對呢種講法有佢嘅道理，但我哋必須要留意嘅係個分寸。首先，到底呢樣嘢成效大唔大先，又會唔會有咩副作用？做運動減肥都唔係一味死做啦，亂咁嚟盞受傷。再者，個人覺得投資嚟講短期同埋長期都要平衡到嘅。如果磨煉意志磨煉到你當刻完全做唔到嘢嘅，又未必係理想嘅方式啦。
話說一寫呢啲懶係人生道理嘅嘢就會好勁驚俾人覺得我老屎忽。講到尾，寫呢篇嘢唔係話要教人啲乜，不過係想提醒下自己唔好再犯同樣嘅錯。個人覺得寫嘢對疏理自己思緒好有幫助， 有時啲嘢寫咗出嚟就真係有分別，如果各位睇完有咩感悟觸動就更加係意外驚喜啦，睇完唔認同嘅都可以一齊傾吓，笑。總之呢啲都係有則改之無則加勉啦～
又話說呢篇文喺六月天氣開始轉熱時諗住寫，拖下拖下就七月都嚟到，某程度上都自證咗（我嘅）意志有限，笑。但寫得完總算係好事。
有興趣可以睇下我其他雜文～
